Прифаќајќи дел од одговорноста дека водата, нашиот подземен ресурс е тешко обновлив и дека е неопходно да се заштити од прекумерна и нерационална потрошувачка, ви го претставуваме едукативниот проект „Чиста вода за здрав свет“ во организација на Интерактивна мрежа за образование и ресурси – ИМОР и Општина Карпош.
Проектот се спроведува во следните пет основни училишта на територијата на Општина Карпош: ООУ „Вера Циривири Трена“, ООУ „Владо Тасевски“, ООУ „Петар Поп Арсов“, ООУ „Војдан Чернодрински“ и ООУ „Јан Амос Коменски“.
Во едукативните работилници организирани во основните училишта на територијата на Општина Карпош, учениците преку користење на видео материјали, експериментална и истражувачка работа на интерактивен начин ќе се едуцираат за важноста на водата за животот на луѓето, растенијата и животните, кружниот циклус на водата, загадување на потоците, реките, езерата и морињата, заштита и заштеда на водата.
Во рамките на проектот ќе се организира завршен настан на кој ученици – претставници од петте училишта креативно ќе творат во изработка на постери/плакати на тема „ Секоја капка чини “. На завршиот настан ќе се организира и квиз на знаење меѓу екипи од училиштата на тема „Водата – залог за иднината“.
Цели на проектот:
1. Подигање на свеста на учениците дека едноставни активности можат значајно да ја намалат потрошувачката на водата.
2. Придонес учениците и пошироката заедница да разберат дека заштедата на вода е од витално значење за нашата иднина.
3. Подигање на свеста за поврзаноста помеѓу чиста вода и добро здравје, особено во светски контекст.
Теми на едукативните работилници
- количеството на водата на Земјата и користење на водата
- значење на водата за човекот, растенијата и живиот свет
- непотребно трошење на водата (во рамките на оваа тема ќе биде изведен експеримент во кој учениците ќе ја проверат исправноста на казанчињата во ученичките таолети)
- кружен циклус на водата (во рамките на оваа тема учениците ќе го изведат експериментот „Модел на воден циклус“)
- загадување на водата (во рамките на оваа точка учениците ќе експериментираат на тема – кисели дождови)
- заштита и заштеда на водата
